近日盛傳58歲荷里活巨星湯告魯斯（Tom Cruise），與年輕20歲的新片女拍檔Hayley Atwell一見鍾情，2人於片場形影不離，更多次被拍得十指緊扣！
湯告魯斯自2012年與前妻姬蒂賀姆絲（Katie Holmes）離婚後，至今未有正式拍拖。近日傳他與合演《職業特工隊7》（Mission : Impossible 7）的英國女星Hayley擦出愛火！報道指他們日前在倫敦拍外景時，因劇情需要而一齊被鎖上手銬，期間一度十指緊扣。拍攝驚險場面時，他亦攬實女方纖腰，被指唔願放手！而早前2人在羅馬拍戲時，亦被拍得拖到實。
據消息人士透露：「湯同Hayley拍攝首日已一拍即合，封城同拍攝期間所有阻滯，反而令佢哋關係愈來愈親近。佢哋會喺半夜三更見面，Hayley仲去過湯喺倫敦嘅寓所。佢哋相處得好好，睇嚟好開心。」上月女方於社交網上載2人拍攝期間在車內的合照，並留言笑對方是她的新駕車師傅，希望自己不會炒車。
此外，日前靚佬湯在片場鬧爆2名工作人員違反社交距離指引的聲帶流出，雖然他講明不會停拍，但有傳媒踢爆他已於昨日提早放聖誕假，乘私人飛機到邁阿密，與養子康納（Connor）度佳節，未知會否帶Hayley同行。有傳媒翻炒10月時他與Hayley在羅馬拍攝時的照片，見他們言談甚歡，女方更被拍得不正確戴口罩，露出鼻孔，批評靚佬湯「大細超」！
查實今次已非靚佬湯愛上女拍檔！其前妻妮歌潔曼（Nicole Kidman）、前女友彭妮露告絲（Penelope Cruz）都是合作拍戲而撻着。至於Hayley曾拍攝電影《美國隊長》（Captain America），2013年戀上模特兒Evan Jones，但2年後分手，之後與1名英國醫生拍拖，但有指他們今年初已分開。