余潔滢渲染幸福心郁郁恨嫁
藝人余香凝早前升呢人妻，其餅印妹妹余潔滢直言為她開心，亦令原本不恨嫁的她心郁郁：「之前覺得梗係事業行先，依家會想有自己嘅家庭幸福，不過冇話下個拍拖就一定要結婚，我未成熟到組織家庭。」問到與家姐感情深厚，會否不捨對方出嫁？她笑說：「冇咁嚴重！都會見到。（佢嫁咗仲好？）我好衰，有次行街好想買衫，問佢幾時執晒啲衫走！清空佢個衣櫃，我就可以擺多啲嘢。」有傳家姐已有孕，問她是否準備做阿姨？她即醒目封嘴：「順其自然啦，有得做梗係開心。」
拍劇濕身撞正「不方便」
提到在ViuTV劇《男排女將》飾演排球隊助教「安安」，她表示最難忘是在冬天露腰，又要着短褲拍濕身戲，除了凍到震外，最尷尬是撞正「不方便」日子：「好驚濕咗唔知會點，好彩冇事，劇組準備得好充足。」又指與前輩鄧麗欣（Stephy）合作很緊張，至煞科時才敢邀對方合照。
處女作要「問功課」
問到劇中被小鮮肉包圍，是否零舍興奮？她笑說：「唔識佢哋，所以好驚同擔心，好彩顧定軒做我阿哥，主動同我傾偈。」首次拍劇的她透露有向家姐取經：「有次覺得做得好差，返去同家姐講，佢叫我問多啲導演同編劇意見，同埋熟讀劇本。」
另外，劇中陳宇琛向Stephy真情告白後修成正果，雙方更會蜻蜓點水式接吻，但考慮到疫情，決定改用借位方式拍攝。