陳豪留港過聖誕 豪買禮物氹家人
已是3位小朋友之父的陳豪，日前出席商場聖誕活動時心繫仔女，不停於熱點「打卡」跟他們分享。他慨嘆現時環境不理想，希望藉節日令大眾開心，並已諗定豪買禮物送給家人度佳節。
日前陳豪出席大埔超級城舉行的「聖誕老人玩具Factory」活動，期間遊覽商場4個景點，包括聖誕老人玩具Factory、巨型夢幻水晶球、聖誕扭蛋小火車及幸運輪打卡牆，他大讚布置漂亮兼有氣氛。
置身童話國度
身為慈父的他知道仔女最愛小火車及水晶球，即時自拍並傳相片跟仔女分享。當他走進巨型夢幻閃鑽水晶球內，恍如置身屬於自己的童話國度。他坦言遺憾仔女未能一起到場，否則必定帶他們入內跳舞狂歡。
談到即將來臨的聖誕節，他坦言基於疫情關係而未能出埠，故有意與家人到商場歡度：「佢哋一定開心到不得了，會唔肯返屋企。其實今時今日環境唔理想，會更加珍惜開心嘅聖誕節，同埋喚醒大家要開心。依家同朋友好少見面，覺得大家應該多啲互相問候同關心。（買咩畀屋企人做聖誕禮物？）要睇佢哋有咩需要，如果豪啲就手提電話，朱古力同曲奇都係最佳選擇，因為可以一齊分享。」並指太太陳茵媺最拿手煮火雞，而且一年比一年進步，非常期待品嘗愛妻的手勢。