蕭正楠走甩疫症 險被老婆毒害
蕭正楠早前因接觸過新冠肺炎確診者，因而被強制檢疫，日前完成隔離返家獲太太黃翠如「獎勵」消夜，沒料進食中途才發現河粉發霉兼魚蛋發臭，令其哭笑不得！
無綫昨日為新劇《愛美麗狂想曲》宣傳，蕭正楠、李佳芯、陳豪、陳瀅等一眾演員出席，剛「出關」的阿蕭，坦言過去兩周作息時間正常，起初為安頓太太3餐，也有為她作出視像指導。
當晚隔離完畢返家，太太為他準備愛心消夜，但進食期間卻發現有問題：「河粉發咗霉，魚蛋有啲臭，佢同我講係雪櫃入邊嘅食物，一直冇理到，我估唔到佢迎接我呢一餐係咁豐富，可能佢見到我太開心，見到雪櫃有乜嘢就煮。」對於同劇的陳豪催他生小朋友，問到與太太沒見兩周是否更親密？他笑說：「陌生咗！因為太耐冇見，等堆積吓感情先。」
至於已有３個小朋友的陳豪，就笑指不介意傳授生仔秘笈，更說：「我覺得阿蕭會係個好爸爸，生小朋友之後會有好大轉變，同埋佢係一個好渴求家庭嘅人。」
李佳芯接受姊弟戀
而佳芯右腳被石頭𠝹損，自嘲是容易受傷的女人，幸好「被仔𠝹」冇損傷。劇中除了與陳豪演情侶，她與何廣沛亦有一段姊弟戀，笑言若現實中有此遭遇真的不知所措：「劇本有浪漫、親情、荒誕同上天下海，好多幻想嘅情景都會發生，拍嘅時候我都會諗如果真係遇到呢啲情況我會點。（現實中接受姊弟戀？）我唔會抗拒，我諗姐姐去到某一個位應該冇乜所謂。」