李佳芯陸永飛車私奔衰頭大走樣！

李佳芯（Ali）與陸永昨日拍攝電單車私奔戲，穿婚紗的Ali與揸電單車的陸永似足拍經典電影《天若有情》，陸永自嘲：「真係幾似o架，除咗個男主角核突之外！」

視后李佳芯與陸永昨日在元朗工業邨為無綫新劇《智能愛（AI）人》拍攝飛車私奔戲，陸永駕電單車載着穿婚紗的Ali逃亡，浪漫又喜感十足。要威當然要戴頭盔，不過「大頭妹」Ali被擠得面容扭曲，不禁笑說：「我個頭好大，加埋個假髮，個頭盔戴唔落，條眉好似戚咗上去！」後來換上較大的頭盔，她才還原靚樣。

受訪時講到飛車戲似足電影《天若有情》的經典場面，Ali說：「坐喺電單車私奔係相當浪漫嘅，但係劇情係有啲擔憂嘅狀態，唔係咁浪漫。」陸永則笑說：「係好有『天若有情』Feelo架，係冇噴血嗰下，同埋個男主角核突。好彩戴咗個頭盔，所以點揸都有型。」在旁的Ali亦自嘲：「個女主角都差啲。」

提到劇集即將煞科，2人可以放聖誕假休息，Ali笑說：「有啲唔捨得陸永，佢做綜藝節目多，以前少機會合作。佢真係好有喜感，唔使講嘢，對住鏡頭已經好好笑，大家合作得好開心。」陸永笑說：「呢啲係叫嘲笑！」

李佳芯陸永飛車私奔 衰頭大 走樣！