張建聲懶理警告 玩命減磅
藝人張建聲早前為了拍戲，過度操肌導致休克，醫生已警告他不能再過分操練，否則隨時冇命！可是一向拚搏的他卻無視警告，為了配合不同角色，繼續「玩命」將體重暴升暴跌。日前他便喪做運動，為明年1月開拍的泰片做準備，片中將與緬甸影后合作！
張建聲（Justin）出名拚搏，經常為演好角色作「自殘式」演出。早前他便為電影《一秒拳王》的拳手角色，40日內由圓潤身形「狂操」變肌肉男。雖然最後效果甚佳，但操練過急令他的身體不勝負荷，曾出現心跳紊亂，一度休克，醫生警告他不能再極速增減磅，否則心臟隨時無法負荷，性命不保。
情挑緬甸影后
雖然如此，Justin近日又再接受挑戰，一口氣接了多部電影，將身體「搓圓撳扁」。明年1月他將拍一部泰國電影，與緬甸美女影后Wutt Hmone Shwe Yi合作，需由185磅減到150磅。日前便拍到他於將軍澳寓所附近「喪跑」做運動，當他熱爆剝衫之際，驚見型男竟多出了一個「大肚腩」，兼且手臂肥肉鬆弛，難怪他操到大汗淋漓也要堅持下去。
原來2個月內減35磅只是「前菜」，3月Justin會拍一部勵志電影，向香港武俠片致敬，又要增磅至200磅以上，6月又再為另一套電影減回150磅，7個月內超過130磅的體重落差，完全無視了醫生的警告！
想做好演員
Justin受訪時透露「玩命」式演出的原因：「自從拍完《反黑》招積呢個幾受觀眾歡迎嘅角色之後，我一度好迷失，令身邊嘅人好失望。經過一段時間沉澱，我開始清醒番，想用行動證明自己毋忘初心，做個好演員。好記得我偶像周潤發講過『片場飯盒係最好食嘅』，同佢合作《無雙》嘅時候，喺佢身上學到好多嘢。疫情之下，每個工作都好珍貴，我希望演好每個角色。我會依足營養師、健身教練吩咐，每日量住心跳、血壓，一有異常就會即刻停止，大家唔使太擔心。」