美國歌影視天后珍妮花露柏絲（Jennifer Lopez）雖已年屆51歲，但仍然keep得好好，她為新單曲碟封面全裸上陣，大騷魔鬼身材！不過，近日卻因未婚夫分享的一張機艙照片，令她遭網友插爆罔顧疫情兼炫富！
「籮霸」珍妮花昨日於社交網上載新碟封面，照片中她全裸大露招牌「優質股」之餘亦順便騷巨型鑽石訂婚戒指。她留言：「驚喜！呢個係《In The Morning》嘅官方封面照。 」除了公開噴血唱片封套之外，她亦於社交網上載拍攝花絮片，粉絲留言大讚火辣！查實年過半百的她仍然可以Keep住副「偈」，絕對下過不少苦功，包括經常健身並與粉絲分享操肌照。
另一方面，珍妮花的前棒球巨星未婚夫Alex Rodriguez（A-Rod）日前於社交網上載她在私人飛機躺在床上睇手機的照片，而床上鋪了一張名牌毛氈。他放閃留言：「夫人絕對準備好迎感恩節！我哋有太多嘢感激，並好興奮返家與家人共度。咁你哋嘅假期計劃點過呢？」
不過粉絲似乎對A-Rod的留言感到不滿，冷嘲他們竟然可以在疫情期間飛返家鄉過節。有粉絲語帶諷刺地留言：「我點過？睇吓先……留喺屋企囉！因為疫情大流行唔可以去探家人！」更有粉絲批評他們炫富：「啲人因為疫情而失業……或許你應該停止晒你架私人飛機同你張氈。我哋知道喇！你好有錢！」