湯洛雯踢爆戀情 丁子朗嚇到口窒窒
曾公開表示視湯洛雯（靚湯）為女神的丁子朗昨日與女神同場，做慣司儀口齒伶俐的丁子朗全程口窒窒，又被靚湯踢爆正在拍拖，令他要急急求救。至於靚湯揚言不會閃婚及瞞婚，並坦承最近跟黃心穎少聯絡。
藝人湯洛雯與丁子朗昨日出席帝舵表活動，視靚湯為女神的子朗受訪時怕醜仔上身，全程說話口窒窒：「好開心，有個咁好嘅前輩。」靚湯即開玩笑說：「你做乜示愛？」子朗稱2人曾在《娛樂大家》合作，但一起出席活動還是首次。問他會否自high，把自己當成靚湯男友馬國明？他急急重申：「唔會，我認真工作，但係好開心同興奮。」期間靚湯突然爆他有女朋友，子朗否認跟華姐林宣妤拍拖，稱對方是好朋友，之後更向靚湯求救：「其實點答，可唔可以請教吓你？」靚湯笑言：「我係直認，你都直認啦！」求救失敗的子朗惟有說：「喺香港有一齊食飯，係好朋友。（依家分隔兩地。）可以視像通話同傳短訊。」
循序漸進唔閃婚
另外，有傳靚湯與馬國明明年初結婚，靚湯否認：「冇結婚同求婚呢件事，我哋只係拍咗拖幾個月，唔想咁快。之前話我哋睇樓盤，其實係經過櫥窗望吓。如果結婚唔會隱瞞，呢方面大家有共識，做藝人有正常拍拖生活都好正常。（好快會結婚？）依家相處舒服，喺磨合期，要了解大家生活，循序漸進，我唔會閃婚。（先同居？）我同父母一齊住，如果佢唔介意嘅話。」至於有指靚湯父親送馬鞍山物業給她當嫁妝，靚湯稱自己有畀錢。
提到最近被發現她與好姊妹兼馬國明前女友黃心穎在社交網互相取消關注，靚湯自言不知情：「我follow咗就唔會再掂，所以我都唔知點解。（大家唔係朋友？）我唔會話唔係朋友，佢去咗美國後係少咗聯絡，但中間有傾過，不過最近大家都忙少聯絡。（知唔知無綫同心穎解約？）我未了解，我連自己份約都唔了解。」