「電競女神」Rose Ma轉型玩蠟：我唔會自殺！
「電競女神」Rose Ma（馬俊怡）月前捲入不雅照風波，事後「失蹤」數月，直至昨日現身拍廣告成焦點。她不欲正面回應，只強調不會被打倒：「唔會因為人哋嘅說話而自殺！」又轉移話題自爆當上蠟蠋製作導師。
昨日一眾KOL包括Rose Ma、小雲寶寶及陳嘉儀（Tracy）等，齊齊現身拍攝巴士車身廣告，小雲寶寶與Tracy各行各「露」，前者露出纖腰，後者則拋胸搶Fo，相當吸睛。Rose Ma甫現身即被追問8月捲入不雅照風波，她只說：「呢方面我唔回應喇！（擔心會有第2波？）有乜好擔心？如果擔心，我唔會仲喺度！我唔會因為人哋嘅說話而自殺，冇嘢可以『打冧』我。」又指心情愉快，不時於網上做直播，與粉絲互動。
為ViuTV拍攝新節目
談及早前「消失的日子」，Rose Ma透露主要是休息：「不過9月左右我開設香薰蠟燭工作坊，教人製作香薰蠟燭。（收支已平衡？）係，但暫時未咁大想頭開分店，反而想專心研究整蠟燭技術，目標係幾年內開個屬於自己嘅蠟燭展覽。（轉型？）都係嘅，我讀過藝術，希望做啲自己有興趣嘅嘢，但幕前工作都會同步進行。」她又透露近日為ViuTV拍攝有關做家務的節目，問到最怕做甚麼家務？她說：「最怕洗廁所，因為濕立立！平日我都會做家務，但可以嘅話梗係想請鐘點啦！」
小雲寶寶胸墊重2kg
至於專注台灣發展的小雲寶寶豐滿上圍配纖腰，似乎不合比例，性格爽朗的她自爆：「我上圍一啲都唔勁，加咗幾個墊，有成2kg咁重！（平時直播都係咁？）應該話直播嗰時冇咁覺。（出寫真？）我比較想集中火力玩電競。」模特兒Tracy則透露稍後會推出新歌，3年前曾推出寫真的她被問到會否捲土重來時，她笑說：「1本就夠喇！」