徐榮練「內功」出奸招 張曦雯兜巴星

轟烈談情怕觀眾唔Buy

角色奸又不能奸出面，徐榮坦言好在有劇情輔助，毋須套用太多反派的肢體語言：「我所有奸都係喺對手背後做，唔使擺到明，今次仲有少少幽默。好想做每個反派都唔同，所以喺造型上專登用曲髮。（驚唔驚變咗奸角專業戶？）觀眾鍾意睇呢種，奸又冇所謂，其實有好多種變化，好似全世界公認好人，原來表裏不一亦得。近年演咗4、5套奸嘅，反而好少演專業人士，醫生同律師都冇演過，想試吓。」談到劇中利用好兄弟韋家雄，徐榮指雙方多次合作，充滿默契：「佢好多Idea，開工時會掟出嚟一齊傾。（劇中有冇感情線？）我同張曦雯有少少，不過冇親熱戲，摑我就有！本身喺劇好少談情，有都係虛火。（想唔想有轟烈感情線？）觀眾鍾唔鍾意睇o架？」

視像「煲粥」捱到殘

問到仔女是否每晚捧場？徐榮指快將15歲的兒子已赴英國求學，暫時無緣觀賞：「而阿女就唔畀佢睇住，喺佢面前做唔到反派樣。（哥哥係咪習慣英國生活？）幾好，每日有視像通話。因為有時差，所以呢排我個樣似開完通宵咁。（疫情過後就飛去探仔？）計劃農曆新年過去，但要視乎疫情。」