陳婉衡斷六親狠撇爆肌男友

陳婉衡（Alycia）早前成功考取健身教練牌後，其「蜜桃臀」迷倒不少跟隨做運動的男學員，直至半年前一名從事金融業的爆肌男學生，終於打動芳心，成功將她私有化。雙方有共同喜好，本應情投意合，增添拍拖的情趣，可惜這位大隻仔過分低調，不予Alycia將他的模樣曝光之餘，兼且佔有欲太強，不許女友有自己的社交圈，日日要陪伴在家煮飯，又不准女友衣着性感，令到Alycia多次因意見分歧而鬧交。一對戀人未能在社交取態上取得平衡，而女方亦忍不住日日有異性冇人性的生活，只好分手了結，這段「操肌戀」半年貨仔，最後「見光死」，不少Alycia的朋友都戥她高興，甚至恭喜她重獲自由！

化悲憤為食量

回復單身的Alycia，受情傷只好寄情工作，連日來見她除了返回電視城為有份主持的《無綫娛樂新聞》開工外，便獨個兒到餐廳醫肚，狀甚孤單。

女生要衝破這個情傷關口，通常都是化悲憤為食量，日前見Alycia在尖沙咀一間日式甜品店食Pancake，期間不停打電話，相信是跟久未聯絡的好朋友傾心事，因Alycia被男友「困」了半年，要急急冧番身邊一班好朋友「補鑊」。及後見她再到超市購物，重過單身生活，只揀選小量食物，得一個人食就簡單得多。

約好友行山療傷

事後記者就分手一事聯絡Alycia，她承認剛分手一星期，情緒不太好，需要時間沉澱，她表示：「初時以為大家好夾，但相處落覺得佢大男人，佢連我一啲好Close嘅女性朋友約會都唔鍾意。我覺得唔可以有異性冇人性嘛，就算拍拖都應該有大家嘅社交圈子，但呢個問題似乎唔太解決到，大家成日鬧交，我覺得好攰呀！拍拖應該開心，所以最後都係Break啦！（搵朋友療傷？）佢哋聽到仲恭喜我添！話終於可以見番我喎！」而她前日上載與鄺潔楹和鞏姿希的行山照片，看來其社交生活逐漸回復舊觀。