肥媽痛別摯愛：天堂見！

現年66歲的肥媽（Maria Cordero）昨日凌晨於社交網宣布老公Rick的死訊，她上載合照並寫道：「My love my man RIP .see you in heaven（天堂見），親愛的老公安息。」兩人結婚21年，Rick於2017年患上末期肺腺癌，因要對抗病魔而經常出入醫院，做過多次大手術，肥媽曾透露醫藥費超過600萬元。

今年8月，Rick因肺炎與血管閉塞再度留醫，肥媽為貼身照顧，搬到病房全天候照顧他。肥媽接受訪問時表示：「Rick尋日下午呼吸不順坐救護車送院，到半夜1點左右離開，過程唔辛苦。」肥媽還表示老公死因是肺炎，至今她仍難以接受摯愛已離開。

為免肥媽傷心過度，家人着肥媽在丈夫出殯當日才到場，身後事由家人處理。

謝嘉怡為肥媽祈禱

由肥媽提名參選港姐的謝嘉怡，聞噩耗甚為傷感：「朝早聽到呢個令人傷心嘅消息，呢段悲傷日子裏，我會同肥媽以及佢屋企人一齊祈禱，希望Rick能夠安息。」

而肥媽契仔陸浩明（6號）昨日表示會幫手搞身後事：「好難接受，希望肥媽唔好太傷心，保重身體。」6號表示日前與肥媽在電視城錄影節目，她當時很專業，完成工作便回家照顧老公。

而肥媽好友黑妹亦有見Rick最後一面：「佢安詳離世，最辛苦就係肥媽囉！肥媽照顧老公無微不至，希望佢保重身體，Rick好好安息啦！我會多啲陪肥媽㗎喇！」而漢洋則謂：「好可惜，喺我記憶留低嘅都係佢哋嘅開心片段，好多高興場合佢哋都會攬攬錫錫，肥媽唱歌嘅話，佢老公就打鼓，好恩愛。」