方力申講陳瀅出晒汗：冇話冇可能

方力申去年打造個人創舉，完成45公里香港環島泳並籌得逾千萬善款，並把過程拍成記錄片，昨日在尖沙咀舉行首播會，好友張繼聰、周家蔚及歐鎧淳等現身支持。方力申指環島泳令他重新愛上游泳，現時每星期都會游泳4至5次外，更說本來另有新挑戰，惟因疫情關係而打消，他說：「因為疫情冇得返大陸做嘢，冇工開，成日練水，就諗過不如游多次，由香港游去澳門，喺大嶼山嗰邊游過去，到依家連澳門都去唔到，唔通游完唔上岸咩？所以要睇吓出年有冇契機做。」

談及其游泳學校因疫情影響下虧蝕，方力申表示在政府資助30多萬元下，現蝕約40多萬元，暫時還算可以應付，本來談及生意時顯得從容的他，被問到緋聞對象陳瀅早前自爆被他邀請單獨約會晚飯時，他即開始不斷流汗，頻頻以紙巾抹汗。他否認想追求對方，至於有否機會發展，他說：「冇話冇可能嘅，暫時冇一齊食飯囉！（係咪因為佢有男友？）唔知喎，如果有男友就更加唔會約啦，電話都唔會攞。（所以你唔知佢有冇男友？）佢咁秘密，我唔知。」

張繼聰唔同老婆過聖誕

另外，自言下月於澳門開工拍戲的張繼聰，表示將未能與家人在港過聖誕節及農曆新年，笑言要孤獨守在酒店喊，又說疫情影響工作量，故要食老本：「個個都係咁，我都有拍抗疫電影、廣告，開咗10日工。（積蓄見底？）咁又唔會，不嬲有儲錢。」問到有否再買電單車，他即面露尷尬神色：「買咗3架，但唔係好貴，十幾萬。」

同場的周家蔚透露老爺洪金寶健康不錯：「佢身體冇問題，依家斷食減緊肥，係膝頭嚴重少少。」她又表示非常掛念在內地工作已半年的老公洪天明，笑言間中會要求幫手隔空教仔。