陳楨怡艷福放送 周街亂拖仔

應屆港姐謝嘉怡、陳楨怡、郭柏妍，再加上朱敏瀚等昨午現身電視城，出席無綫《台慶鉅獻：變形金剛終極戰士》宣傳活動，眾人大玩遊戲，場面熱鬧。3位港姐對該系列電影讚口不絕，最搞笑是陳楨怡指當年入戲院睇戲時，因覺得緊張全程捉實旁邊友人的手，記者打趣追問對方性別，她靦腆說：「朋友囉，不過以前試過喺街捉錯陌生男士隻手，以為係我爸爸呀！」

謝嘉怡唔心急拍劇

她又透露即將會考車牌：「第3次考路試嘞，希望今次成功。」郭柏妍聞言即搭訕：「我有牌，都係考咗3次先成功，依家都唔敢揸出大馬路，只係喺屋企附近兜圈咋！」

談到應屆落選港姐紛紛簽約無綫，謝嘉怡不擔心有競爭：「大家性格同路線都唔同。（表姐源菲然開始有工作。）佢有同我講，戥佢開心。（你都想快啲拍劇？）今年仲會有好多慈善活動，學好啲廣東話先啦！」

郭柏妍（右起）、謝嘉怡及陳楨怡均愛看刺激電影。

朱敏瀚暫時冇打算飛台灣會女友。

朱敏瀚靠視像傳情

另外，對於女友余思霆預算逗留台灣半年，朱敏瀚說：「佢都係幫公司拍嘢，因為佢入境唔使簽證，所以揀咗佢，但如果中間有其他工作，佢都會飛返嚟嘅。（呢段時間點維繫感情？）視像囉，好彩依家科技發達，如果唔係10年前就要寫信喇。咁啱我連開兩套劇，可以專心工作，尤其拍《拳王》打到飛起，又要除衫騷肌，呢排收工都要操，食嘢亦以清淡為主。」