Jessica瞓身肉誘 嚴防不速之「嚇」

組合Super Girls成員蔡明思(Jessica)於結婚一周年,斗膽背住老公大解放,首次以三點式現身,其喱士Bra Top更透肉色,令人想入非非!不過她拍攝時最擔心的並非走光,而是蟲蟲來襲!

去年升呢人妻的Jessica,日前挑戰性感底線,首度在鏡頭前以三點式為自家品牌手袋拍廣告,大晒修長美腿及小蠻腰。今次是她為工作着得最少布的一次,坦言過程大感尷尬:「以前去旅行,人人都着三點式就冇所謂,但工作時得我一個咁性感就好唔自在,因為尷尬同冇自信!」她又指事前不知道要着三點式,所以零準備,不過信任拍攝團隊及形象指導。

蟲蟲留童年陰影

而她最難忘穿上大露背短裙躺在草叢中,因為擔心遇上「死敵」,她說:「我好驚昆蟲,細個有蟲喺樹上跌落我身上!今次要瞓喺葉度,唔知係蟲卵定發咗霉、密麻麻嘅雜草,睇見都身痕,忍得好辛苦!」談及生育大計,她透露仍在努力中,希望仔女緣分早日到。

另外,她又在社交網分享人妻生活,自言初期諸多不慣,如討厭睡覺時有人郁嚟郁去,又要煮飯及洗碗,令她有痕癢的「主婦手」!不過有晚發噩夢,老公連電視都不看,由客廳走入房陪她睡,她說:「令我有從未有過嘅安全感,願意繼續為佢煮飯煮到有主婦手。」