張曦雯私伙出征 喱士Bra情挑羅子溢

張曦雯坦言愛買性感內衣，但並非為了男友。

藝人羅子溢（前名羅仲謙）、張曦雯與韋家雄等，昨日在將軍澳宣傳新劇《木棘証人》，當中羅子溢日前在網上公布與太太楊茜堯（前名楊怡）為家人健康而改名，問是否得高人指點，他說：「改咗一段時間，唔係刻意，咁啱有緣分。（改名希望生仔？）呢個係表面解釋，其實係就番筆劃、五行，普通話拼音我個名有『怡』呢個音，佢個名就有『謙』嘅音。（想旺事業攞視帝？）旺事業就包埋，攞獎就要睇天時地利人和喇！」最近忙做「奶爸」的他不忘晒「麒麟臂」，笑說：「依家要扮演人形遊樂場，跳樓機、摩天輪、海盜船呀！」又指將來可考慮一家三口演出，但酬勞會收得好貴！

• 羅子溢不介意舉家演出，但要收天價喎！

男友冇送內衣

而張曦雯劇中買黑色喱士內衣色誘羅子溢，更出動私伙拍攝，問到現實中可喜歡買性感內衣？她笑說：「每個女仔都鍾意選購靚內衣，好似買靚鞋咁，不過屋企內衣唔及靚鞋多。（鍾情咩款式？）我做Model出身，開工嘅時候最鍾意着肉色內衣打底。（男友對款式有冇偏好？）咁又冇，佢亦冇送過畀我，內衣係氹自己開心而買，唔係為咗人。」

活動上，眾人玩遊戲砌拼圖，韋家雄大講有味笑話：「我由細到大最鍾意砌嘢，我砌完要抖抖，冇咁快再砌得。」全場爆笑！張曦雯趁機「投訴」，笑說：「我經常畀佢笑到NG、失控！（劇集口碑好，有利爭視后？）冇諗咁多。」