黎紀君遊西澳爆喊：朝朝簽生死狀！
有「甜心女神」之稱的藝人黎紀君（Christy）熱愛挑戰，去年底她到澳洲拍攝旅遊節目，期間簽了4張生死狀，她笑說：「以為自己好大膽，其實幾驚死。」她與陳立安（Brian）、駱振偉近日在ViuTV播出的《駕到西澳》節目中連環接受多個刺激遊戲挑戰。最初開會時她只知玩跳降傘要簽生死狀，不料到埗後每日都要她簽一張：「朝朝早都有喎！」
行程中她最喜歡探視海豚，但期間卻被教練腳上的防鯊電圈踢中而「觸電」，她說：「雖然唔係好勁，但有電流，我感覺到個身震咗一震，係幾特別嘅經歷。」而最驚險的，她表示要在20層樓高的山崖游繩，她說：「真係好驚，喊到傻咗，經理人話我喺山頂坐咗15分鐘冇郁過，我諗緊係咪真係要拍呢？真係有諗過放棄，但最後同導演溝通，佢話做啦，我咪照做！」當日玩完後她頓覺放下心頭大石，但原來第二朝的行程又要簽生死狀，她即笑說：「又嚟！」
跳降傘唔識驚
此行，她還要爬落一個深洞，約5層樓高，她感覺難度不大，但說：「係一個舊嘅監獄地牢，到現場見到都幾震撼、幾驚，Brian仲話：『我喺你樓下墊底，你跌落嚟我接住你。』」最後她接受跳降傘的挑戰，但笑言連日來「已經驚完」，並說：「佢哋提我如果唔想跳兩次，就唔好擘大個口，因為鏡頭影住會好核突。」最終她順利完成拍攝，又笑指翻睇錄影片段時見自己全程合埋口，相當搞笑。