李佳芯馮盈盈任咀陸永無福消受
「視后」李佳芯和「女神」馮盈盈將於無綫新劇與陸永發展三角關係，日前陸永分別與兩女拍咀戲，但他坦言冇感覺，而佳芯笑言：「冇感情嘅咀戲都係第一次拍！」
李佳芯、馮盈盈和陸永等主演的無綫新劇《智能愛（AI）人》題材破格，除了出現新、舊版的機械人外，還描述人與機械人的愛情。日前三人分別拍了兩場人工呼吸的戲份，劇情講述演機械人的佳芯跌落水，體內的電線被水草纏着而短路，陸永幫她從口中啜出水草；而盈盈在車廂暈倒，被陸永救出後施以人工呼吸。
唔識拍談情戲
有幸與兩位女神拍談情戲的陸永，受訪時卻表示冇感覺：「我同佳芯、盈盈嘅感情戲冇乜發揮，先講佳芯，佢飾演機械人，我原本當佢工人咁用，到後期先發生感情。而盈盈就係我上司，大家有啲感情瓜葛咁啦。（好多人羨慕你同兩位女神談情。）嚴格嚟講係佢兩個爭我。（好爽？）其實我唔太敢，亦唔太識談情，自己對呢方面嘅演繹冇乜太大期望，談情戲梗係小鮮肉演先好睇！」
至於佳芯笑言：「係呀，佢幫我啜水草，所以有場人工呼吸嘅咀戲，我終於試到一場冇感情嘅感情戲，我都係第一次拍。」盈盈則說：「陸永唔敢用力咀，要導演叫先敢用力，做真嘅人工呼吸，之後幾Take完成。（事前有冇準備？）事前同事後都有消毒，我仲帶埋漱口水、牙膏牙刷清潔！」
泰臣「去毛全清」
「高智能AI」佳芯於劇中除了服侍陸永一家，又多次出手為蔣志光、盧宛茵和麥美恩解決問題，劇中還有一位「搞笑版舊AI保安員」泰臣，與佳芯比併時發生不少趣事。泰臣笑言：「我冇佳芯咁勁，係未Upgrade嘅AI，之前我花咗幾個月練習機械式動作，好彩之前讀演藝，有默劇嘅訓練，食過吓夜粥先滿足到角色需要。角色係好好玩，但最慘機械人係冇腳毛，而我本身係『飛毛腿』，用咗20張脫毛紙『去毛全清』，開始發覺行路平衡唔到，仲見凍要着長褲！」