區瑞強力保招牌：有啲唱得好Hea！
「民歌王子」區瑞強（Albert）將於本月23、30以及11月6及13日舉行《華永善亮人生，區瑞強網上演唱會》，除有J.Arie（雷深如）擔任嘉賓外，還有好友胡楓、李龍基、曾路得及神秘嘉賓等坐鎮，騷上大唱靚歌，Albert與J.Arie會合唱主題曲《人生隨想曲》新版本，希望疫情下發放正能量。兩人前日接受專訪，他向J.Arie大笠高帽：「請J.Arie嚟可以令個騷趨向年輕化，佢之前喺我節目唱英文歌唱得好好。」J.Arie則坦言跟實力派前輩開騷有壓力，但會視為受訓機會。
唔習慣冇錢收
每年必會舉行10至20場實體演唱會的Albert，無奈受疫情影響而取消，但為幫助幕後音樂團隊有工開，故首次接網上騷，一口氣開四場：「依家網上騷係大勢所趨，但未來我都會實體、網上兩邊搞，開網上騷最唔習慣係冇錢收！」J.Arie即提議可採用「課金」形式增加收入：「試過有個月唱咗20個鐘搵到5萬，而最差一個月都有1萬收入。」
Albert又鼓勵歌手多舉行網上騷，賺不到錢也可以爭取曝光率，但個人認為仍要保持專業：「我見過有啲歌手好Hea，唱又唱錯、錯完又甩嘴，一時又停咗，真係接受唔到咁唔專業！可能佢哋覺得Casual咁做好型。」J.Arie自言開網上騷出名認真，有時更被勸要放鬆心情。