Eason呻荷包「乾硬化」戶口有出冇入

陳奕迅（Eason）最近推出廣東新歌《致明日的舞》，希望透過音樂令大家放鬆面對疫情下的生活。問到疫情影響下近一年都停工？他即自爆患病：「患咗『荷包乾硬化』同『急性發錢寒』，哈哈！其實好多人都係咁，只係我藉機會公開呢個病。（蝕咗幾多錢？）唔知，之前收入好平均，但好耐冇見到有進帳，好在我有積穀防饑。（幾時恢復工作？）呢年嚟淨係拍過快餐店廣告同錄音。」

跨年騷補唔番！

問到去年取消的跨年演唱會何時補辦？Eason笑言知道有傳楊千嬅爭贏今年底的紅館檔期：「其實我冇爭過，我冇入紙申請！（幾時開番個騷？）講真未知係咪真係開到，我知道2021年應該冇乜期，雖然聽聞今年取消嗰啲可以優先揀番出年，但我係上年，而且Book好長嘅期，如果唔係補唔番製作費！舊年開25場，我要35至40日先得，因為預中間要抖。（心急開騷？）已經唔急啦！」

雖然收入減少，但亦因為疫情，Eason坦言多了時間在家做運動，身體比之前Fit很多：「我鍾意滑雪同打網球，如果『螺絲』生銹就做唔到，所以想Keep住螺絲、關節靈活。」又指現時多了時間與狗狗相處，與家人亦多了傾偈，問到太太徐濠縈可有嫌他煩？他笑說：「佢唔使對住我o架！我哋好Free，屋企每人都有自己角落。」

某部位太粗礙跳舞

MV中有代表不同界別、年紀的舞者，表達社會上不同人士面對不同挫折及壓力，帶出要從創傷、失敗中學習。Eason又自爆有份跳「現代舞」：「即係情緒帶動嘅舞蹈，我畀朋友睇個MV，佢睇得好投入，但我一出現佢就笑咗，可能佢未見過我跳現代舞。（跳舞好難？）其實我身體幾靈活，係略為粗咗少少……隻手臂，哈哈！」

此外，Eason的經理人公司昨日發出嚴正聲明，指有公司在網上發布虛假消息，自稱是明年3月舉行陳奕迅世界巡迴演唱會廣州站的主辦商並正在招商，對此將保留一切法律追究權利。