羅仲謙幫張曦雯爭視后
藝人羅仲謙與張曦雯（Kelly）在新劇演歡喜冤家，昨日齊齊出席宣傳活動，阿謙揚言向來旺女主角，合作後對方必定攞獎，故願意把自己的幸運送給Kelly，睇好她今年爭視后。
羅仲謙、張曦雯、張秀文及徐榮等昨日出席無綫新劇《木棘証人》宣傳，相隔4年再拍無綫劇，阿謙認為自己轉變不大，反而無綫多了不少新崛起的女星，更喪向Kelly笠高帽，指她一劇接一劇成為力捧對象，氹得Kelly非常開心。
阿謙坦言有幸與Kelly合作，自誇一向旺女主角，每當合作過後，對方必定能踏上頒獎台：「Kelly力捧緊，自己都好彩，不過有啲女仔同我合作過嘅就會攞獎。（你老婆楊怡？）佢係前輩，經驗豐富過我。」對於被指返無綫拍劇爭視帝，他表示只是陪襯及講笑，更指曾有幾年提名過「飛躍進步男藝員」，但從未跑出，問到今年可有信心拎獎？他大耍太極說：「希望套劇口碑好緊要啲，我就將自己個Lucky畀Kelly，畀唔畀呢啲係公司嘅鼓勵，最緊要開心，Kelly嚟緊播兩套劇唔同性格，可塑性好高。」
而即將開拍《白色強人II》的Kelly，亦分別有《木》劇及《踩過界II》緊接播出，問到是否想爭視后？她似乎零信心，並謙稱：「冇！一定唔會！（阿謙旺女主角喎！）咁可唔可以攞多次『飛躍進步女藝員』？呢套劇係我喺美國讀完演技課之後拍，希望大家睇到我有進步啦！劇入面同阿謙又打又錫，算係咁耐以嚟最多錫戲嘅一次。」
張秀文自爆麻甩
至於露腰又穿熱褲騷長腿的秀文，於活動上被要求擺出港女十式甫士，事後笑說現實生活較麻甩：「森美話見到我就諗起碟頭飯，但有時我都好女仔嘅，如果遇到熟嘅朋友，我粗豪得、扮低能亦得。」近日與崔建邦主持清談節目的她，透露嘉賓全是崔建邦的圈中好友，日前已完成首集錄影：「第一集嘉賓係姜皓文，佢好Nice。（有冇問佢啲黑歷史？）每個人都有拚搏、高低潮嘅時候。（唔驚得罪人？）我成日都得罪人o架啦，不過我會笑番去氹人，多數都會被原諒。」