曾樂彤捱眼瞓 趕住獻初吻
英皇歌手曾樂彤推出新歌《天空之門》，希望大家能以正面的態度和活力面對疫情。除了出新歌外，她有份演出的ViuTV劇集《熟女強人》正熱播，她飾演吳家麗的秘書，並與方力申師弟、「飛魚男神」朱鑑然發展出「關係」。談到兩人的親熱戲，她大呼首次演咀戲及床戲很緊張：「收到劇本心諗得唔得o架？結果拍出嚟好有可看性，都係搞笑為主，可能大家睇完會覺得冇乜嘢，始終係電視尺度。」
尷尬唔敢睇playback
講到獻出「螢幕初吻」及床戲給朱鑑然，她笑言不敢回看自己的演出，幸好拍攝時克服了心理關口：「因為拍攝時我好眼瞓，又唔想耽誤劇組時間，同埋我都尷尬，所以好快拍完。（豁咗出去？）冇乜holdback，但唔係親密戲上嘅豁出去，而係講我角色黑仔，會發生狀況。」提到與朱鑑然合作，她坦言兩人拍劇前已認識，更大爆對方表面是男神，實際是個大男孩：「雖然我哋好chur，每日瞓得兩、三個鐘，但係佢永遠都好精力充沛。我哋偷時間休息，佢就成日影我瞓覺，後尾我同佢鬥幼稚影番佢，所以同佢合作冇任何尷尬。」
不提感情事
提到戲中跳性感舞步，樂彤笑言：「嗰場戲係朱鑑然腦入面嘅我，所以要做到同角色好唔一樣，係好有自信嘅女仔。我拍嗰陣同自己講『我要瞓覺』，我已唔記得當時感覺。」問到演戲經驗尚淺的她，有否問男友游學修的意見？提起感情事她即避談，表示只問過同門楊天宇的意見：「佢今次都有床戲，佢之前都拍過親密少少嘅戲，所以就問佢，佢話淡定就冇事。」她坦言現時繼續專注工作：「以後無論有冇拍拖都唔講啦，因為大家會轉移咗視線，所以都係做好自己工作算。」