伍富橋「降呢」朋友少聯絡 林穎彤眼濕濕呻混亂

藝人林穎彤、泳兒、譚嘉儀、應屆港姐謝嘉怡等，昨日在將軍澳電視城出席《善心滿載仁愛堂》記者會。最近有指林穎彤與伍富橋分手，並在社交網互相Unfollow，再見不是朋友！林穎彤受訪時強顏歡笑，眼泛淚光說：「係冇乜聯絡，之前一齊宣傳歌嘅時候比較好朋友，依家接近冇聯絡。（點解呢？）冇乜特別話題就少咗聯絡。（Unfollow對方？）係呀！我一向Follow好少人，只係Follow最熟嘅朋友。（因了解而分開？）係朋友、同事，啱傾可以做到好朋友，唔啱傾嘅就係同事、朋友。（可惜？）冇乜特別可惜，大家性格唔係好適合做好好嘅朋友，我比較活潑，佢就文靜啲。」並直言未準備好再拍拖，現在思緒有點混亂，再拍拖也希望找圈外人。

孔德賢否認撬牆腳

至於「後生仔」孔德賢最近被指介入落選港姐廖慧儀與男友Sam的感情，導致兩人甩拖，他說：「唔清楚，已經冇聯絡，大家只係普通朋友，唔使成日Keep住聯絡。（話你係第三者？）唔係，一路冇追求嘅意思。（佢單身會唔會追求？）唔會喇！想專心工作。」

而謝嘉怡近日搬屋，除親手裝嵌傢俬外，原來連髹漆也一腳踢，她透露在蘇格蘭不時與朋友一起裝飾家居。