張彥博70萬買車 耗盡積蓄報親恩
張彥博入行捱足15年，星途浮沉，拍過近50套劇集，獲封為「綠葉王」。自小於破碎家庭長大的他，不但欣然接受母親再婚，更視繼父如親生父親般看待。近日有讀者爆料指他經常出入醫院，日前上午10時許，本報拍得他以白色跑車接載家人前往位於油麻地的醫院，並攙扶家人進內。約15分鐘後，他折返停車場駕車到附近便利店，買了數支樽裝水及三文治後，於座駕呆等個多小時才離開，估計是返醫院接載家人。
多謝繼父錫媽咪
記者聯絡上張彥博，他透露繼父今年上旬不幸再度中風，故他花盡儲蓄買新車，以便每月親自載父母進出醫院覆診，他說：「不幸中嘅大幸，繼父康復進度好好，依家算行動自如。佢以前已經做過『假死重駁心血管』大手術，當時醫生話如果唔做手術，壽命唔會去得遠。做呢個手術要鼓起好大勇氣，但佢肯為我媽而接受，因為唔想留低媽咪孤伶伶一個，令到我好感動。」
他表示現時搬回舊居，方便貼身照顧兩老：「冇咩可以回饋佢，只能夠盡小小心力去照顧佢嘅日常生活。其實我好多謝佢好錫我媽咪同親戚，我希望將來有能力都可以照顧到身邊咁多人。」提到他駕駛靚車，他表示今個月迎來「男人40」大關，是為獎勵自己及接載家人所買的生日禮物。翻查資料，其新車價值約70萬港元，相當大手筆！