蘇麗珊拖新歡登場熱戀冇得停

蘇麗珊昨日出席有份投資的按摩店開幕禮，獲好友林德信、Super Girls成員Cheronna、Jessica及BOP天堂鳥成員Gordon等現身撐場。一身白色打扮的蘇麗珊心情靚爆滿場飛，原來有愛情滋潤，雖然起初提起新戀情也一臉靦腆，到後來才大方拉埋男友Kenny拖手合照。

冧讚男友有才華

蘇麗珊透露現時仍是發展階段，問到是否熱戀期？她笑說：「係唔會停嘅熱戀期，都係睇點樣維繫，依家OK嘅！（拍拖一個接一個？）唔係，我上年去美國前分手，到返嚟隔咗一陣，畀自己沉澱吓，咁啱又遇到一個可以試吓。佢係圈外人，有投資生意，好有才華，大我5、6年。（平時有幫男友按摩？）互相幫忙，咁係可以增進雙方關係，係好冧嘅事，不過通常我幫佢多啲，我覺得自己技術唔錯，平時都有向舖頭嘅師傅偷師。」

談到現時投資生意頗大風險，蘇麗珊則認為大家受疫情影響難免不開心，更需要有一個地方來平靜心情，故投資約6位數字開店：「按摩一定會放低電話，暫時離開啲煩嘢。（會做生招牌？）我有同管理嘅同事講下星期返工幫手聽電話，但按摩就未夠班。」

Gordon爆隊友情史

而Gordon對於隊友Tyrese日前求婚成功，笑指也是從社交網取得消息：「好突然，但都恭喜佢。佢哋識咗好耐，以前仲一齊出嚟踩單車，係後來撻着咗，大約兩年前。（咁你又幾時好事近？）我有對象嘅，但希望工作順利咗先啦！」