黎諾懿豪語膺3料視帝即息影
藝人高海寧最近四劇連播，她昨日出活動時透露做過街頭訪問，觀眾對她連出四劇的反應很好，讚她有進步，對於被指這是公司為她奪視后鋪路，她即自言不敢多想。身旁的黎諾懿則揚言若同時獲視帝、最佳主持及節目獎就決定息影！
高海寧（高Ling）、黎諾懿、簡淑兒等昨日現身劇集《C9特工》的宣傳活動，高Ling劇集四連播的局面亦隨該劇本周大結局而告一段落，她說：「一次過播晒四套係好開心，之後可以休息吓！但我得番一套劇存貨，有啲存貨個心會定啲，怕觀眾下年喺螢光幕見唔到我。」她稱之前做過街頭訪問，調查觀眾對她劇接劇的反應：「大家反應好好，睇晒四套，觀眾最鍾意《C9特工》。（冇有話睇到膩？）連播都唔係我控制到，觀眾都明白，仲話見到我進步。」有指「連播」舉動是公司鋪路讓她奪視后？她說：「我唔敢諗，呢啲係天時地利人和，唔到我控制，我做好本分。」
最忙諗菜單
至於黎諾懿透露現時忙於構思菜單，因有三個關於煮食的綜藝節目同期錄影。對於既做主持又拍劇，他笑稱想同時獲得最佳主持、最佳節目及視帝三獎：「攞到三個獎，我就可以息影！我為息影鋪路，如果公司畀獎我，證明尊重我，唔畀即係我有利用價值。」
另外，簡淑兒最近與男友復合，但稱不用刻意去維繫：「我哋唔係熱戀期，一齊過又分開過，對大家嘅習慣同底線都好了解。（可以直接結婚？）今次一齊反而冇講呢個問題，依家跟感覺走。」