菊梓喬𢱑劇拍唔識門路
歌手菊梓喬首次擔任美容院代言人，透露拍廣告期間擺高難度甫士時搞到腰傷，自嘲年紀大需要「保養」。近期拍劇拍出戲癮的她公開𢱑撈，希望繼續獲賞識。
菊梓喬（Hana）昨午悉心打扮，以一襲紅色晚裝現身宣傳活動，吸引大批鐵粉圍觀。戴上口罩防疫的她獻唱娛賓，場面熱鬧。今次疫市有工開，她顯得相當雀躍，透露今次以「開心誠意價」拍廣告。
談到拍攝難忘事，Hana笑說：「我要着小背心露腰扮美人魚擺甫士，拗住腰咁Keep咗幾個鐘，返到屋企後出現腰痛！（性感造型？）我係健康嗰隻。」對於身形，她坦言最不滿意下身：「所以好少着短裙同短褲！其實咪睇我咁瘦，年紀大咗容易有ByeBye肉，需要接受療程，希望結實啲。（滿意上圍？）我唔係追求呢啲嘢嘅。」
年底推出唱片
至於早前完成無綫劇《刑偵日記》拍攝，Hana表示拍出戲癮：「真係好想再拍劇！但要睇吓有冇機會，事關我份人好鍾意做嘢，最好24小時塞爆佢！（返公司上製作部𢱑撈啦！）我唔識路呀！」又表示早前已為該劇灌錄插曲，感覺相當特別，年底則會推出唱片，屆時要投入密集式宣傳。