美國真人騷家族Kardashians成員出名多是非，今次輪到Kendall Jenner與妹妹Kylie！她們的家族真人騷節目《Keeping Up With The Kardashians》（KUWK），最新一集踢爆二人開拖，用高踭鞋插頸兼兜巴星，卻遭網民質疑為收視而做場大龍鳳！
預告片中，Kylie、Kendall兩姊妹與母親Kris Jenner及其他家姐食完飯後分車走人，期間Kris與Kim等在車上收到Kendall FaceTime來電並爆粗說：「佢用高踭鞋插X我條頸！」之後聽到Kylie插嘴：「咁係因為你摑X我！」不久，嬲到着火的Kendall跳上車向家人投訴Kylie與她嘈交，繼而互相掌摑，還喊住話以後唔同Kylie傾偈！Kendall解釋姊妹開拖的導火線是Kylie不問自取，拎她的衫來着，據知她事後已原諒妹妹，但Fans卻留言希望代她追究。
由於《KUWK》向來被批評造假，不少網民懷疑她們只是做戲，有人留言：「真係好好笑，從來都唔明點解啲人睇呢個家庭？」亦有人認為整件事是「有晒劇本嘅廢話」，更有網民慶幸節目明年完結：「感謝主個騷就快完，其實10年前應該要玩完！」
最搞笑是有網民找出二人多年前在真人騷中打大交的舊片，笑指是今次事件的遺失片段，Kylie不但冇嬲，還轉載片段兼說：「都幾準確！」而Kendall亦留言：「笑屎我！成件事就係咁！」Kylie前日上載多年前與Kendall及母親慶祝萬聖節的舊照，看來兩姊妹已和好。