陸詩韻未夠大方拒換妻遊戲
藝人陸詩韻除了演藝事業之外，亦自創美容品牌。現時ViuTV播映的劇集《熟女強人》中，她是一名紅酒商人，並與劉浩龍飾演夫婦。劇中老公劉浩龍是一名婦科醫生，二人因性生活不協調，在雙方同意下嘗試換妻，以刺激夫婦之間的火花。
陸詩韻拍攝前曾經做過資料搜集，外國確實有不少這些案例，她謂：「我未必可以咁大方，我唔會想同其他人分享自己鍾意嘅人。我問過朋友，佢哋雖然冇試過，但內心係接受嘅。嗰對夫婦結婚十幾年，好信任對方，佢哋都覺得如果可以刺激到對方，不妨一試，可能會有番戀愛感覺。（會否投入咗感情喺其他人身上？）都有咁嘅可能，玩出火都未定，所以要有好大信任同大方先可以做到，不過對我嚟講太新潮喇！」
生意幕前兩兼顧
劇情有提及成功女人背後的顧慮，詩韻坦言自己的顧慮是要求太高，不想依靠別人，這都是因多年前感情錯付所致：「如果我當年唔係有呢啲經歷，依家未必可以承受到，未必可以重新建立自己事業。我對自己要求好高，達唔到目標就覺得自己好差，呢個係我嘅問題，可能我唔識欣賞自己。」至於生意與幕前工作，她坦言享受拍劇，會盡力分配時間：「如果角色有發揮空間，我係好想繼續拍嘅！雖然拍完通頂返屋企都要睇電郵、分貨，但呢個係我責任。」