荷里活影壇巨星湯告魯斯（Tom Cruise）日前在挪威拍攝《職業特工隊7》（Mission Impossible 7）時被野生捕獲，當時他在高速行駛中的火車上拍動作鏡頭，毫無懼色危坐車頂向粉絲微笑揮手，睇見都牙煙！
58歲的靚佬湯出名搏殺，拍攝危險鏡頭都不會用替身！最近有Fans分享他拍攝《職7》片段，見他危坐火車車頂邊緣，當時還有幾名臨時演員及攝製人員在他身旁，其中有人企在車頂，認真膽生毛！片段曝光後，不少網民激讚靚佬湯藝高人膽大：「佢咁嘅年紀仲親自上陣，簡直係驚人！」
除了在火車頂拍攝，靚佬湯上月亦被拍得於英國牛津郡一個廢置空軍基地拍攝電單車飛車鏡頭，在500呎高斜坡駕車一躍而起半天吊，十分驚險！查實《職7》自開拍以來波折重重，年初因疫情而一度停拍，直至7月才復工，但開工不久便遇上電單車特技人拍攝飛車場面時發生爆炸意外，令進度再受阻。
靚佬湯每次為《職工》系列拍攝都毫不錫身玩命，觀眾睇見都標冷汗！最經典一幕要數到由吳宇森執導的《職》續集，靚佬湯在沒有救生網的情況下徒手攀山拍攝，期間意外整傷膊頭；最驚心動魄則是拍攝第4集《鬼影約章》時，在世界最高摩天大廈、高2,722呎的杜拜哈利法塔外牆攀爬。去到第5集《叛逆帝國》再向高難度挑戰，他徒手爬上軍用飛機起飛離地5,000呎。
「上得山多終遇虎」，靚佬湯拍攝第6集《叛逆之謎》中一場跳樓戲時發生意外撞傷腳，導致影片要停工9星期。早前有傳媒踢爆他計劃兩年後、即60歲完成最後兩集《職》片便「收山」，不再親身拍攝動作鏡頭。