羅思雅首做女一扮J.Arie
現年26歲的2019年亞姐羅思雅（Caca），近日參與微電影拍攝，初嘗做主角滋味，故事講述她如何反抗父母去追夢，而角色原來是以歌手雷深如（J.Arie）為創作藍本，J.Arie亦會在片尾出現。Caca表示私下不認識J.Arie，但覺得二人有相似之處：「佢唔遵從父母期望，父母想佢做律師，但佢最終圓夢做歌手。佢由細到大係乖女，同我都好似，父母想我做專業人士，想我讀商科，我畢業後都做咗大半年核數師，算有交代啦！」
對於今次被選中的原因，她估計是導演知道她喜歡唱歌，亦能自彈自唱。片中亦有幾場激動戲份，她說：「角色性格有少少反叛，其中幾場要同戲中父母駁嘴，嘈得幾激烈，我都真係有憤怒情緒。（導演覺得點？）佢話冇諗過我嘈交幾自然，但有進步空間。（你細個都反叛？）最反叛只係染金髮，中三暑假嗰時，爸爸好唔滿意，直頭唔想同我同枱食飯。」