女星林雅詩早前因男友偷食兼有私生子而大受打擊，禍不單行，日前於迷糊狀態下，在10秒內被「快閃」搶去鑽石手鏈。自認因感情受挫而消瘦兼上圍縮水的她，幸好向網紅界發展有斬獲！
林雅詩早前經歷男友馬天樂偷食女助手兼育有一子，令她震驚萬分，怎料黑開有條路，前晚她突然網晒獨照，相中見她右手手臂、腋下對落位置瘀青一片，她自爆返公司途中有人上前撞她，只是10秒之間，其鑽石手鏈已丟失。
昨日林雅詩接受本報電話訪問，指該條價值約5位數字的手鏈只是首次佩戴：「估唔到咁就冇咗！我唔舒服，食咗藥暈吓暈吓，喺街行緊時，有人迎面撞埋嚟，其實我覺得佢有少少特登，但冇理繼續行，點知行行吓Feel到隻手少咗啲嘢，先發現條鑽石手鏈唔見咗，即時沿路行返去搵，但已經搵唔番。條鏈價值5位數字，好肉痛！（報警？）唔會啦，當破財擋災，呢排自己都會小心啲，唔會戴貴重飾物出街。」
有得必有失，雖然感情受挫，又痛失鑽鏈，但她透露現往直播網紅方面發展也不錯：「依家除咗打理時裝店生意，幾乎每個星期都會做直播，同網友講吓鬼古，分享我嘅個人經歷，發現大家都好鍾意。網民可以透過直播送禮物畀我，之後換錢變成收入，依家直播咗一個月，最厲害試過有一次收到近5位數字嘅禮物。」
對於有網民指她比前消瘦，她直認因感情事搞到冇胃口，令「咪咪」也縮水：「瘦咗有20磅。上圍有少少縮水呀，但依家胃口好番啲，大家唔使擔心。」