單立文密密賺 深圳收埋「小三」

用嚟威脅老婆 堅呷醋

單立文與胡蓓蔚（豹嫂）結婚12年，一直予人感覺相當恩愛，但原來兩年前曾有相士批單立文若無仔女，今年將有小三！他笑言老婆胡蓓蔚「驚到瀨屎」，還與小朋友上契希望化解，問到現在有否被老婆全天候監控？單立文竟自爆10多年前已有「小三」：「10幾年前已經同佢講我有『小三』叫佩恩，呢個『小三』喺我哋兩公婆中間已經好多年，住喺深圳福田區嘅……其實只係虛擬唔係真，只係用嚟威脅吓佢，等佢唔好咁鬆懈。（咁老婆乜嘢反應？）佢有時會叫我搵佢，有時會呷醋，真係做到足（交足戲），唔係點玩到咁多年。」

笑胡蓓蔚工心計

兩公婆甚麼都玩一餐，「互窒」也是兩人的「家常便飯」！單立文早前因睇錯通告，胡蓓蔚即把屋企預備好的晚餐帶到片場給他享用，全程網上直擊，不少網友讚豹嫂是好老婆，但原來在單立文眼中卻是另一回事：「佢呢啲門面嘢梗係做足，好明顯係工心計！一Cut機嗰下啲面口不知幾難睇，煮飯畀老公食係天經地義，喺社交網拍晒Story咁，係咪有心造作先！哈哈！」

狠下苦功「熊樹仁」入屋

由音樂人殺入影壇，再由影壇走入電視台，單立文可算是百變藝人。由奸淫的「西門慶」到現在入屋的「熊樹仁」，單立文的演出令觀眾留下深刻印象，為演活《愛》劇的角色，更將作息時間180度大反轉，亦在設定方面下了很多苦功，難怪幾乎晚晚都見到他，成了該劇「爆騷王」之一！

送跑車冧妻

不過，他踢爆「一山還有一山高」，呂慧儀與周嘉洛才能稱得上「爆騷王」：「大家留意番，佢哋喺呢個劇嘅線係最多，周嘉洛除咗熊家，仲有補習社、酒吧、大學嘅戲份，雖然我都唔弱，但唔夠佢哋強。（唔弱都即係搵唔少！有冇買乜嘢鼓勵自己或者氹老婆？）佢（豹嫂）耐唔耐就會提醒我想買啲乜，呢啲嘢佢好明確，唔使我特登諗，畀舊錢出嚟就得。（最貴禮物？）有送架跑車仔畀佢，但佢都有送番架車畀我嘅。」

西門慶始祖 死守唔除底褲

回顧拍電影的日子，觀眾最記得的當然是「西門慶」與《賭俠》的侯賽因，曾有指他是「被騙」去拍三級片，到現場才知要剝衫，單立文對此笑說：「當時因為啱啱推行電影三級制冇耐，大家對於尺度都仲係摸索中，當年搵我拍戲嘅知名製片講廣東話又唔係好正，好多嘢我都唔係好聽得清楚，又妖魔、又特技，聽到一頭霧水！去到問服裝部我有乜嘢服裝，阿姐望一望我答：『你使乜服裝呀你！冇喎！』之後先知係乜嘢一回事，當然都照拍。（話你死守唔除底褲？）係呀！點拍都唔除，如果除埋咪淪為A片之流！作為一個演員，能夠演到情慾嘅感覺，可以令觀眾信服就可以，冇理由會想睇我嘅『八月十五』啩！」

估唔到「想偷我雞」成經典

至於《賭俠》中的侯賽因，單立文指當年有份「見識」影壇大哥與導演王晶的相處：「現場都有幾多衝擊，一路拍就一路撞橋，當時周星馳同王晶有好多火花，星爺邊拍邊有啲建議，晶哥都會盡量滿足，好自由。我當時好彩做細，少埋身戲，都係喺旁邊觀摩吓，但呢套戲近年耐唔耐播番，令到嗰場『想偷我雞，冇咁易！』成為咗經典，拍嘅時候真係冇諗過會嘅。」

後記 好多人驚咗我

80、90年代不時出現女星主動獻殷勤的八卦事，單立文當年拍戲都算高大型男，問到可有遇過「女星夜敲門」等艷遇？他一臉正經說：「冇，因為演奸角太多喇！好多人都驚咗我，連我契女胡定欣都話以前見到我都好驚，想喊嗰隻！加上我當年又好戇居，放假就永遠匿喺屋企玩音樂，根本唔會有女人埋身。」不過，他直言當年見證過一些女星對喜歡的人作主動追求，最後更修成正果，亦覺得拍戲投入到某個程度，愛上對手是人之常情，記者遂問他有冇試過「戲假情真」？他搞笑說：「我當年拍親都係強姦戲，點戲假情真？入咗TVB後確係多咗演感情戲，但嗰陣已經爐火純青，唔會賴嘢。」