鞏姿希買車唔成慳家食快餐
藉參選港姐入行的無綫娛樂台主播鞏姿希，之前成功考獲車牌，成為「P牌仔」。考到車牌當然想買車，但疫情關係，幕前工作減少，「錢」途未明，只好先到車行「望梅止渴」。日前鞏姿希孖住一位大隻男到灣仔一間二手車車行，他們在車行氹氹轉，不斷睇款又睇價，鞏姿希本對其中一架價值8萬元的汽車情有獨鍾，但與大隻男咬耳仔一輪後，最終未有扑槌。
之後鞏姿希和大隻男到了快餐店撐枱腳，共享一個價值約30元的套餐，非常慳家！昨日她接受本報電話訪問，原來大隻男是她的弟弟，當日陪她睇車，她說：「都係想買架車代步，所以周圍睇緊。始終第一次買車，所以都係想買架二手車，價錢大約7萬蚊左右。依家市道唔好，所以都係睇吓，做定功課先，暫時都未有心水。」
