MV貼身舞攬仔 泳兒爆男友監場

歌手泳兒收到新歌《溝渠暢泳》歌詞後在家中練唱，期間一度爆喊：「非常之有血有肉！雖然佢描述得好抽象，但有好多字句我覺得係直插入我心入面。」MV中要飾演男主角心中的陰暗面，令對方馴服於她，導演要求兩人以舞蹈表現出來，所以有不少親密接觸，泳兒笑說：「睇到參考時我以為係一隻好優雅、好似跳華爾茲呢啲舞，點知一埋位原來係貼身咁跳，初初都有啲尷尬！頭幾個鏡頭係有啲繃緊，慢慢就進入咗狀態。」問到髮型師男友可有批准如此親熱演出？她指對方有「監場」：「喺現場幫我整頭。」