吳業坤爭陳曉華 唔Mind𡁻完鬆
何廣沛、陳曉華與吳業坤昨日為無綫新劇《異搜店》進行拜神儀式，講到劇中發展三角戀，首次擔重戲的坤坤不望爭贏，笑言只想與陳曉華有段乾柴烈火的感情戲，認真大膽！
藝人吳業坤在無綫新劇《異搜店》中，與男女主角何廣沛、陳曉華有段三角關係，三人昨日出席新劇拜神儀式，問到男女間爭風呷醋的劇情，坤坤笑言旨在有得發揮，並期望與陳曉華有段深刻感情戲，就算分手都冇所謂：「今次戲份算重，劇中有段三角戀。（同曉華有冇纏綿情節？）未知！劇本都未出晒，唔知爭唔爭得贏。（想輸定贏？）如果吸引到觀眾嘅，應該要同女主角有乾柴烈火戲份，就算最後分手都唔緊要，旨在有發揮！（現實中會想追求嗎？）佢太高，我覺得保護唔到佢，加上佢學過跆拳道，雖然我都學過空手道，但都唔夠佢高級數，切磋吓就無妨。」
何廣沛搭𨋢疑「撞嘢」
《異》劇於盂蘭節期間拍外景，何廣沛與陳曉華坦言遇上不少靈異事件，先有壞電腦離奇開機，又有遇上電梯無故熄燈：「其實開兩個月外景都順利，係遇到唔少靈異嘢！好似尋晚一齊收工搭𨋢，點知部𨋢到咗開門竟然熄燈，又有啲咚咚聲，好得人驚！後尾隔籬部𨋢到咗，我哋即刻入去啦！（覺得靈異？）當嗰部𨋢係壞咗囉！」至於對靈異事件可有忌諱，曾在醫院做實習護士的陳曉華覺得行得正企得正，不用太驚：「冇護身符辟邪，因為喺醫院都聽過唔少同事講！」反而何廣沛自言怕怕：「我試過拍殮房戲，要講『我唔迷信』呢四個字，但成晚都講唔到，好似畀人掩住個口咁！人哋以為我玩嘢，其實我係講不出聲！」
此外，黎燕珊於《異》劇中演靚媽角色，有陳曉華與麥秋成做仔女，笑言日日開工都很開心。問到有否出動私伙，她說：「唔使喎！監製好好，搵到好多靚嘢畀我，夠晒靚。同劇又可以跟秋成學吓跳舞，好多嘢玩。」