蕊蕊靠打機 了解追求者

藝人陳蕊蕊與張若錡昨日擔任電競比賽嘉賓,蕊蕊透露平日喜歡打機,10年前試過玩Online Game時,於遊戲中失去價值數千元的武器,氣得她放棄該遊戲。問到可有打機「課金」?她說:「早幾年玩手遊,畀過1萬蚊課金,但之後覺得好嘥錢,自此決定再玩嘅話,最多只可以課金幾百蚊。」

她自爆現時與追求者一起打機,問到可有從中了解對方性格?她說:「有呀,都夾嘅,大家打機都會躁底,好彩完咗個遊戲就冇事。(驚唔驚影響感情?)我性格火爆過佢,佢都會就我嘅。(咁你接受佢?)了解中,一日未結婚都未知,所以會睇定啲先。」