近期加盟邵氏的歌手朱紫嬈入行10年，原定5月舉行演唱會，可惜因疫情而要延期：「舊年5月已經Book咗場地，奈何要延期，可能下年先再做，暫時未能夠確定。」受疫情影響，連帶新歌《花醉》的宣傳工作亦要暫停，她說：「我對上出新歌係5年前嘅事，之前嗰兩隻碟係Hi-Fi碟。呢首歌係想講無奈、無助嘅感覺，但亦希望大家即使唔開心，都要畀個時限自己，唔好唔開心落去。（宣傳有困難？）推出新歌係疫情發生第二波嘅時候，我除咗做電視節目外，平面同電台訪問都做唔到，所以考慮緊會唔會咁快再派台。」
