拍劇遇怪事 何廣沛有異能？壞電腦離奇開動
藝人何廣沛最近忙於拍新劇，自爆期間發生不可思議事件，竟能按動一部封塵十多年、沒有叉電的道具Notebook！由於劇中角色具有特異功能，他開玩笑指懷疑電腦想跟他傾偈。
何廣沛與陳曉華前晚為《異搜店》開工，劇中何廣沛飾演具有能夠感應物件過去的異能，自言雖然生得高大，但其實很細膽，最怕看恐怖片或懸疑片，皆因看後會發噩夢。
拍劇撞正農曆七月，問到有否遇過不可思議事件，何廣沛說：「上月尾我哋拍其中一個單元，有部十幾年前嘅舊Notebook道具，道具部買番嚟時明明已經壞咗，連叉電線都冇，應該唔會有電，點知拍咗幾日之後，有日我貪得意撳開關掣，點知部機離奇着Mon，係冇通電嘅情況下着咗，我諗如果有部機唔叉電一星期都會唔着啦！」
陳曉華：當時冇人識驚
陳曉華覺得最可怕不是電腦無故開啟，而是現場沒有人覺得驚：「個個淨係叫快啲熄番部機繼續拍，但事後大家講起，先覺得奇怪點解會着。」何廣沛突然代入角色說：「我諗嗰件物件真係知我有呢個能力，想開機畀我睇，透露畀我知十幾年前嘅秘密……個故事係咁，真係有啲嘢想同我講，係你哋要拍，夾硬要熄咗機，我冇得同佢傾偈。」陳曉華即笑對方：「你好入戲，快啲返廠啦！」她又表示一向愛玩鬼屋及看鬼片，就算發噩夢也要看，被何廣沛取笑將鬼片當笑片看。