整形科院長操刀 阿嬌再做手術縫幾百針
鍾欣潼（阿嬌）前日在廈門酒店房絆倒撼爆眉骨，傷口長達6cm，深到見骨，被送往急症室縫了數十針，為保靚樣，她當晚進行第二次手術，由任達華介紹的頂級整形科院長為她拆線後重新縫針。經理人霍汶希（Mani）昨日說：「總共縫咗幾百針，因為係整形科醫生做，所以針線方面細好多，表面第一層已縫咗66針。」又透露她要服藥止痛：「阿嬌瞓覺個頭開始好痛，因為做咗兩次手術，要食消炎同止痛藥，眼部同額頭位置腫起嚟，要敷冰。」
阿嬌出事後，在港的嬌媽嚇到喊，Mani說：「但阿嬌唔畀阿媽去廈門，話唔想照顧多一個，阿嬌好Tough，唔想嬌媽來回要隔離14日。」由於手頭上有兩部網絡電影，阿嬌康服後會完成拍攝才返港。