城城心痛老婆受傷害
天王郭富城的太太方媛早前捲入「天王嫂訓練營」風波，昨日城城現身活動時Man爆護妻，直斥報道令太太受傷害，望不負責任的人早日收手。另外，他又自爆太投入電影角色，以致為主題曲錄音時泣不成聲。
郭富城主唱的電影《麥路人》主題曲《灰色星塵》MV昨日首播，他偕戲中拍檔楊千嬅、張達明、顧定軒及導演黃慶勳現身首播儀式。早前有報道指方媛曾加入「天王嫂訓練營」，城城開腔力撐太太：「呢啲係不實報道，網上太自由，散播謠言嘅人唔需要負責任，但當事人好難受。我太太唔係呢行，佢只係半個幕前人，呢啲報道對佢嚟講係一種傷害，我作為丈夫當然會撐佢，希望呢啲不負責任嘅人收手。」
談及歌曲，城城大讚填詞的小美是當今首席女填詞人，又指電影拍畢兩年本已抽離角色，但見到歌詞即淚如泉湧：「我入錄音室時眼淚冇停過，冇辦法唱到。」又指因角色煙不離手，令他在鏡頭內外都不自覺地不停抽煙，以致嚴重咳嗽：「我去咗睇胸肺科，我太投入角色，以為自己有病，照完X光話我個肺好靚，成個人鬆晒，即時脫離到個角色。」
千嬅「失言」嚇親
千嬅亦大爆城城演出投入：「有日放飯，我叫佢食嘢，佢用角色把聲同我講『我唔食，我個角色唔可以肥』，嚇到我講Sorry！另外有次凌晨喺廟街拍戲，有個飲咗酒嘅人望住我，佢又角色上身拉我走，仲長期孭住戲入面個背囊唔肯放低，我心諗個助手咁大膽唔幫佢拎！」城城笑言背囊內只有兩卷廁紙，都是為了投入角色。他又表示作為電影人，見到戲院早前因疫情而關閉感心噏，自爆已參與普及社區檢測計劃，結果呈陰性。