林鈺洧惹禍上身成屋鬼

今年25歲的Denice於20歲入行做模特兒，星運平平，之後轉行在名店做售貨員，現時再投身演藝圈，她說：「之前有份正職，重心放咗喺嗰邊，不過都有接吓Job，但覺得自己可能有正職喺身，所以拍戲時情感唔夠放，演出嚟怪怪哋。」

「時不時就會撞到」

她表示有次試鏡，導演是媽咪的朋友：「佢叫我學拍戲，話我依家有啲嘢塞住咗，情緒唔可以太放，之後喺香港學咗少少，發現自己真係好鍾意做戲，跟住再去美國學，用咗好多積蓄，6位數字去學咗3個月，返嚟香港後就開始嘗試唔同嘅嘢，睇吓有咩機會。（好多人覺得你好適合做綜藝節目？）我嘅目標係多方面發展，你畀咩我做，我都會做到畀你，想做多元化嘅演員。」

為了作多方面嘗試，Denice早前主持ViuTV節目《鬼同妳上位》，她坦言一向畏懼靈異事件，但亦膽粗粗嘗試：「個節目講鬼，有8個女仔一齊探靈。（你唔驚？）驚到震！我不嬲都對呢啲嘢好敏感，係我最驚嘅一樣嘢，我時不時就會撞到，雖然冇實體接觸，但感覺到佢，而我個人又比較驚青，疑神疑鬼，所以個腦成日自己同自己決鬥，見到嗰時會問自己係真唔係真？接呢個騷都係以呢個心態，想親身探究，同靈異接觸，但試咗之後真係好驚，係驚到暈咗！拍完即刻搵師傅幫我睇，佢話我屋企成屋都係鬼。（咁點算？）依家師傅清理咗。」