江嘉敏逐點反擊 冇諗過要釣金龜！

江嘉敏演出的無綫劇集《過街英雄》近期出街，諷刺地2年前拍攝的劇情如預言現實一樣，飾演「拜金女」的她一心釣金龜，而近期她先後發生「富豪船P」事件及被指借黐林凱恩的閨蜜認識「富二代」，認真巧合。對於外間指她拜金，江嘉敏反擊說：「大家誤會咗我！劇裏面講嘅拜金會貪人啲錢、買好多靚手袋、買樓、買車，但呢啲嘢冇喺我現實生活出現過。」

對於與林凱恩慶祝生日而變成「黐金糠」，她說：「只係想畀驚喜林凱恩，點解要將開心事『黑化」呢？大家太大壓力喇！我同鄺潔楹一齊拍緊《七公主》，想畀個驚喜林凱恩，所以先約埋佢朋友買個蛋糕嚇吓佢啫！」江嘉敏強調無意攀龍附鳳，指識朋友不會看對方家底，並說：「我唔需要去認識任何人以躋身上流社會，冇諗過向上流。」

唔識發姣嗲人

早前江嘉敏與馮盈盈傳不和，在劇集花絮中出現她笑指劇中的拜金行為是馮盈盈教壞她，江嘉敏說：「兩年喇！唔記得講過乜。」

她自認容易惹是非，但與男友、家人已練成不看娛樂新聞，故沒有構成壓力。說到演拜金女最難之處，她說：「劇裏面要對住啲『獵物』嗲聲嗲氣、發晒姣咁，我唔係呢種人，好明顯嗲功唔得，真係好難，要上網參考。」