楊怡生日放閃 羅仲謙下廚被嫌棄
藝人羅仲謙與太太楊怡結婚3年多，依然恩愛如昔。二人生日只相差一天，繼大前日謙謙36歲生日後，昨日到阿怡41歲牛一，今年多了女兒小珍珠相伴，別具意義。兩夫婦於社交網上載素顏「閃卡」慶生，阿怡冧爆留言：「特別的一年，特別的時刻，簡單的幸福，願我們都身體健康，永遠開心，Love u」。
開心有假放
正趕拍無綫新劇《兒科醫生》的謙謙昨日受訪時表示：「我開緊工，冇特別向劇組請假，但咁啱呢兩日都有得休息，可以留喺屋企食餐飯、切蛋糕同湊B。（有乜生日願望？）疫情快啲過、小朋友快高長大、大家都身體健康、順順利利啦。（有乜驚喜畀阿怡？）我喺屋企，咪係最大嘅驚喜囉！（會親自下廚？）都係交畀外母，佢嘅葱油雞冇得頂呀。」
湊B練耐性
談到剛開始為《兒》劇開工，謙謙表示暫以群戲及「巡房戲」居多：「日日成班人開工，我同鄭嘉穎、周家怡同張寶兒相處得好開心，大家好投緣、好開心。」另外，日前他與嘉穎接受無綫娛樂台訪問，談到與小朋友拍戲，二人坦言當了父親後，多了一份耐性，嘉穎說：「你急都冇用，佢哋唔聽就係唔聽，同埋一定唔可以對佢哋惡，愈惡愈反效果。」謙仔表示：「依家同小朋友拍劇，聽佢哋講對白，感受唔同咗。」又自爆廚藝不差，但被外母嫌棄：「外母唔鍾意我煮，因為唔啱佢口味。」