高海寧搵啱Mr.Right 隨時唔撈
無綫花旦高海寧與音樂人鄧智偉早前宣布結束4年情，回復單身的她仍不愁寂寞，即使受過情傷依舊對愛情執着，揚言甘願為真愛付出事業，即使退下水銀燈生活也不介意。她又談到曾受輿論壓力而兩度狂甩頭髮，嚴重得要打類固醇針急救。
高海寧（高Ling）當年戀上年長11歲的音樂人鄧智偉，熱戀時更發展至同居階段，惟後來兩人因長期分隔異地，至去年聚少離多分手收場。受情傷的高Ling，也火速收拾心情，劇接劇寄情工作，近期幾套劇均有其蹤影，繼播完的《殺手》及《迷網》，至緊接近日出街的《反黑路人甲》，而她亦參與內地劇《三十而已》，人氣相當不俗。
「所有努力畀性感搶咗」
日前她接受本報專訪，重提上一段感情時也沒有避忌，雖然雙方最後未能走下去，但她揚言愛情觀未有轉變，仍然與過往一樣執着：「只要唔係傷天害理，叫我唔做藝人都可以，當然要係一個大家好穩定嘅情況下啦！但現階段就集中工作，因為愛情呢樣嘢係冇得規劃嘛！」
談到當初立志成為一個演員，高Ling不諱言付出100分努力，但一段時間過後沒太大成效，及後即使被要求性感演出，她也樂於接受，無奈效果不似預期：「變相所有努力畀性感搶咗，好沮喪，有諗過係咪唔適合做呢行。」付出努力未被認同，再加上當時拍劇數量不多，即使有幸參與旅遊節目，惟又被觀眾彈身形肥，於多方面夾擊下，令她壓力重重。
甲狀腺有事
面對沉重壓力，高Ling兩度狂甩頭髮：「第一次係2012年成日要性感，拍旅遊節目又畀人話肥，我狂做運動同唔食嘢，結果甲狀腺出事加甩頭髮，初頭髮型師幫我吹頭見好多窿，後來啲窿愈嚟愈大，頭頂由黃豆咁細變咗一大撻，耳仔側邊有一忽頭髮都冇晒，睇皮膚科醫生打類固醇，一個月之後先開始有啲髮根。第二次係去馬來西亞拍網絡大電影，做女主角壓力大，又多喊戲，返到嚟頭髮又係甩咗一撻。」經歷兩次「鬼剃頭」令她學懂放鬆，笑言否則應該會死幾次。
至於近日於《反》劇演女明星，與老闆石修有感情線，高Ling坦言角色有別於過往：「平時個人特質太強，演戲有自己影子，今次好多人睇咗覺得角色唔似我，放低咗自己，聽到呢啲評語都開心。」