J.Arie踢爆「偽人」嘴臉被嫌奀當透明
歌手J.Arie（雷深如）擺脫框框後自嘲是「毒辣」歌手，新歌《雙面哈菲》給人精神病的感覺，受到同行非議，她說：「就算大家話我黐線，話歌手要有社會責任、要正面，我都唔理！」全因入行七年的她被演戲老師林家棟鬧醒：「佢話：『點解你仲未肯真實面對自己，不如你承認你係咁變態、有精神病。』」所以她決定打開心扉寫日記，將自己不見得光、最黑暗一面全部記錄下來：「就算為世不容、完全唔符合社會道德標準，我都要承認自己係一個咁嘅人。」
個個見鬼講鬼話
J.Arie明白有人的地方就有是非，娛樂圈也不例外，踢爆見盡不少同行的嘴臉：「我未試過畀人背叛，都好慶幸冇聽過啲『銀』耳嘅說話，反而有啲嘴臉見唔少，好似同你講緊嘢，有第二個紅啲或者有利可圖嘅人行過，嗰個人即刻轉移視線，好似唔係好想同你再講嘢！仲試過有啲拋物線咁當睇你唔到，我覺得呢啲嘴臉嘅殺傷力勁過兜口兜面講一句難聽嘅嘢！不過我個人都厚面皮，唔怕瘀，你當見我唔到，我會專登埋去打招呼添。」
與「偽人」道不同不相為謀，J.Arie笑言會在內心反白眼：「喺公眾場合要保持應有嘅社交禮儀，咁就要拎我首《雙面哈菲》出嚟！其實藝人同平常人一樣，個個都係咁，見人講人話、見鬼講鬼話，啱傾咪傾，傾唔到偈咪禮貌打招呼算。」