譚俊彥餐廳重開晚市：畀條生路就好！
隨着第三波疫情回落，餐廳、美容院及戲院逐步獲放寬營業限制，身兼相關「副業」的藝人大為雀躍！譚俊彥希望生意能慢慢回復，湛琪清則揚言會繼續加強消毒防疫，務求令顧客安心。
等了又等，足足等足個半月，昨日開始食肆可以恢復晚間提供堂食，雖然「晚九」便要關門、每枱只可坐兩人，但總算初現曙光，其中經營西餐廳的譚俊彥受訪時直言有幫助：「希望依家慢慢會好番啲，畀條生路我哋就好！上個月係蝕嘅，做外賣唔會賺好多錢，但係都一路叫員工返工，可以有時間試菜，所以依家會推出新菜式，我點都會撐落去！雖然放寬咗，但防疫仲係好緊要，如果確診數字再上升又叫停就麻煩。」
身為燉湯店老闆娘的莊思明則相信對生意有幫助：「一接到晚市可以開到9點，我哋即刻準備，例如店舖清潔再徹底啲，等食客入嚟食得安心啲。老實講，我哋有啲門市平日都係做到9點，而幫襯嘅食客通常好少一家大細，所以『限坐令』同時間上對我哋影響唔算好大，但有番堂食當然歡迎，無論點都對生意有一定幫助。」
戲院人流一般
除了食肆，美容院亦獲准重開，投資美容院的湛琪清開心說：「我今日都返咗公司睇吓大家嘅準備工夫，Booking都滿晒！除咗我開心，所有員工同啲客都好開心，佢哋好想做Facial。我哋一定會加強清潔，員工開工時會戴眼罩同口罩。」而譚杏藍亦表示旗下美甲店昨日預約爆滿，停業期間損失逾6位數字，相當慘情。
另外，電影院昨日雖然重開，但仍受「限坐令」及戲院內不能飲食所限制，記者昨午走訪旺角及尖沙咀等地戲院，人流反應依然一般，而韓片《屍殺半島》半日票房過百萬，可謂「疫市奇葩」。