藝人丁子朗日前在節目中大爆視湯洛雯為女神，入行前已喜歡她，無奈對方已經情歸筍盤馬國明，子朗笑言對女神只敢遠觀而不可褻玩。
獲無綫力捧上位的藝人余德丞、吳業坤、黃庭鋒、丁子朗，日前接受邵氏節目《TIGER'S TALK》主持伍詠薇及林盛斌訪問。四子被問到心目中的女神同事是誰？入行4年的丁子朗坦言鍾意湯洛雯，未入行已經喜歡：「我真係覺得佢好靚！（會唔會嬲咗馬國明？）唔會，可遠觀而不可褻玩！」吳業坤即抵死地說：「咁你即係話馬國明褻玩佢？」伍詠薇聞言出手教訓吳業坤：「死仔！人哋拍拖你話人哋褻玩！」
至於余德丞表示鍾情運動型，例如緋聞女友蔡思貝，但強調：「但唔exactly佢嘅為人！」火速落閘的態度令全場爆笑。吳業坤則大讚馮盈盈又正又索：「因為我個人獨處時比較靜，所以另一個嘈啲，我接受嘅，而且佢真係好索！」黃庭鋒則喜歡朱千雪的笑容。
另外，子朗被爆可以於電視城各層橫行，甚得高層歡心，他笑言因為自己撳錯(車立)，講到工作機會多，他謙稱只是薪酬平之故。而余德丞回想首次拍劇，有好同事願分對白給他，令他有騷錢出，即使對白講得差，對方亦肯為他「食死貓」，認真夠義氣。至於庭鋒曾在國際學校教體育，伍詠薇風騷坐其大髀，問他教書時是否很多媽咪級Fans？他說：「當時有個日本媽媽，我教佢個仔游水，佢會等埋我放學，仲着住短褲背心喺操場拉筋，我兜後門走，好尷尬。」