郭柏妍雙Mask救靚樣 陳楨怡滅瘡迎戰

郭柏妍原來有「舞」功底子。

《2020香港小姐競選》將於8月30日在將軍澳電視城舉行，十強佳麗昨日跟星級排舞師Sunny Wong練舞。大熱的郭柏妍與陳楨怡「舞功」不俗，「過江龍」謝嘉怡與黃婉恩舞藝則明顯遜色，動作生硬兼甩beat。

郭柏妍與陳楨怡表示小時候學過跳舞，現時會在家中對鏡練習。講到備戰決賽，郭柏妍原來有「絕招」：「依家朝早返嚟綵排，會爭取時間喺私家車上敷mask，希望決賽時個樣唔會咁殘，當然敷緊mask外面都會戴口罩。」早前面上爆瘡的陳楨怡，指經過媽媽的湯水及朋友送暗瘡膏急救後，已大有改善。

陳楨怡台型十足，跳得不俗。	廖慧儀無奈成為網上攻擊目標。	謝嘉怡（左）與黃婉恩舞步有點生硬。

壽星女謝嘉怡扭傷腳

至於廖慧儀繼被揭紋身，近日又被毒舌網友狂轟，嘲諷是姣婆。她與男友Sam聯手反擊，指對方錯字百出，要好好讀書，獲網民讚敢言。她昨日受訪時說：「唔係反擊，啲人不停咁惡意批評，我只係留言叫對方『加油！』佢哋就朝7晚10咁留言，其他佳麗提我關閉留言功能，不過我唔介意，影響唔到我。（男友幫口反擊？）叫佢唔好講咁多，但佢忍唔住。（你寸網民要讀多啲書？）佢寫嘅中文睇唔明，仲不斷咁寫錯字，所以先叫佢學好啲中文。 （唔怕得罪網民影響投票？）如果唔鍾意我，我做乜佢哋都唔會鍾意。（男友話買你輸？）佢講笑啫！男友一直好支持我。」

另外，昨日生日的謝嘉怡笑言願望是攞冠軍，講到跳舞表現麻麻，她表示因之前穿高踭鞋時扭傷腳，跳舞時感痛楚而影響了表現。