菊梓喬腹背受敵 掃貨減壓顯「食」力

歌手菊梓喬（Hana）近年盛傳與師姐吳若希爭「星夢一姐」之位，隨着對方佗第二胎，目前放假專心養胎，Hana「一姐」位置本應穩打穩紮，但8月初JW（王灝兒）出其不意加盟星夢娛樂，當年憑熱爆歌《矛盾一生》橫掃樂壇多個獎項，實力可見一斑，更被視為Hana的新勁敵！雖然Hana曾謙稱女歌手獎可以拱手相讓，但同門競爭始終在所難免，左右夾攻之下，Hana無疑要沉着應戰。

日前傍晚，身穿綠色外套、戴眼鏡口罩的Hana獨自現身將軍澳一個商場，見她在幾間食店行來行去，對韓式燒雞似乎甚感興趣，但最後又放低外賣餐牌，轉到另一間拉麵店，但睇完一輪都未揀啱心水，之後她一個箭步直接走入超市，雖然人頭湧湧，有後生仔女瞄到認出她，不停回頭望，但她推住購物車專注「覓食」。身形單薄的她先到凍肉櫃狂掃，買了兩大包三文魚扒，再去揀牛扒、鮮元貝，又買蔬菜、番茄、提子等蔬果，相信差不多夠她食足一個星期。

塞爆購物車

不過Hana意猶未盡，再去掃日用品，見到有新款熊貓卷紙，即好奇攞上手研究，之前再買紙巾、廚房紙、消毒清潔物品，臨走前她走到零食區，曾經自爆「好大食」的她，對薯片情有獨鍾，揚言可以食不停口。面對貨架上的多款薯片，她即雙眼發光，火速揀選了大包裝及筒裝薯片，似乎平日都有食開這兩款「減壓薯片」，之後她見到朱古力餅、曲奇餅等都照擸，終於塞滿購物車才捨得往結帳走人，排隊等畀錢期間，更聽到她攞住手機說：「我買完嘢食就嚟o架喇！」未知是否向妹妹報告行蹤，但看得出她心急趕返歸，除下口罩食番夠本，宣洩工作壓力！